🔪🔫 ૧૫ ગુનાનો વોન્ટેડ સલમાન લસ્સી નવસારીના ડાભેલમાંથી ઝડપાયો

સુરત શહેરના ડિંડોલી, લિંબાયત અને ભેસ્તાન વિસ્તારમાં હત્યાના પ્રયાસ, મારામારી, ખંડણી સહિત ૧૫ જેટલા ગંભીર ગુનાઓમાં વોન્ટેડ અને પોલીસ ચોપડે ચઢેલો કુખ્યાત આરોપી સલમાન ઉર્ફે લસ્સી આખરે ક્રાઇમ બ્રાન્ચના સકંજામાં આવી ગયો છે. આરોપી સલમાનને પકડવા ગયેલી ટીમ પર તેણે જીવલેણ હુમલો કરતાં પોલીસે સ્વબચાવમાં ફાયરિંગ કરવું પડ્યું હતું.

​સુરત ક્રાઇમ બ્રાન્ચને ચોક્કસ બાતમી મળી હતી કે વોન્ટેડ સલમાન લસ્સી નવસારી જિલ્લાના મરોલી નજીકના ડાભેલ ગામમાં છુપાયેલો છે. આ બાતમીના આધારે ક્રાઇમ બ્રાન્ચના પી.આઈ. પી. કે. સોઢા અને પી.આઈ. કિરણ મોદીની ટીમે વહેલી સવારે લગભગ ૩.૦૦ કલાકે ઓપરેશન શરૂ કર્યું હતું.

​પોલીસે સલમાન લસ્સીને ઘેરી લેતા તેણે ગભરાઈને ભાગવાનો પ્રયાસ કર્યો હતો. પોલીસે તેને આત્મસમર્પણ કરવા જણાવતાં જ તે ગુસ્સે ભરાયો હતો અને ધારદાર ચપ્પુ લઈને પી.આઈ. પી. કે. સોઢા પર હુમલો કરવા ધસી આવ્યો હતો.

​પોતાના જીવનું જોખમ જણાતાં અને આરોપીનો ઈરાદો ગંભીર હોવાથી, પી.આઈ. સોઢાએ તાત્કાલિક સ્વબચાવમાં પોતાની સર્વિસ રિવોલ્વરથી ફાયરિંગ કર્યું હતું. આ ગોળી સલમાન લસ્સીના જમણા પગના ભાગે વાગી હતી.

​ગોળી વાગવાથી આરોપી લસ્સી ત્યાં જ ઢળી પડ્યો હતો, અને ગણતરીની મિનિટોમાં પોલીસ ટીમે તેને ઝડપી લીધો હતો. ઘાયલ આરોપીને તાત્કાલિક સુરતની સિવિલ હોસ્પિટલ ખાતે સારવાર માટે દાખલ કરવામાં આવ્યો છે. હાલ તેની હાલત સ્થિર હોવાનું જાણવા મળે છે. આ ઘટનામાં અન્ય કોઈ પોલીસ કર્મચારીને ગંભીર ઈજા પહોંચી નથી. પોલીસે આ મામલે કાયદેસરની કાર્યવાહી હાથ ધરી છે.