ભરૂચ પોલીસની ડિજિટલ સ્ટ્રાઈક: ₹1.09 કરોડની સાયબર છેતરપિંડીના આંતર-જિલ્લા રેકેટનો પર્દાફાશ, 4 શખ્સો જેલના સળિયા પાછળ

ભરૂચ: સાયબર ગુનેગારો સામે ભરૂચ જિલ્લા પોલીસે લાલ આંખ કરી છે. ઓનલાઇન ઇન્વેસ્ટમેન્ટ ટ્રેડિંગના નામે નિર્દોષ નાગરિકોની મહેનતની કમાણી હડપ કરતી ટોળકીને ભરૂચ સાયબર ક્રાઇમ પોલીસે માત્ર ગણતરીના દિવસોમાં જ ઝડપી પાડીને પોતાની વ્યાવસાયિક કુશળતાનો પરિચય આપ્યો છે. પોલીસે સુરત અને જુનાગઢ જિલ્લામાં ઓપરેશન હાથ ધરી કુલ 04 આરોપીઓની ધરપકડ કરી છે.

​પોલીસની સતર્કતા અને સફળતા

​વડોદરા વિભાગના આઈ.જી.પી. સંદિપસિંહ અને ભરૂચ એસ.પી. અક્ષય રાજના માર્ગદર્શન હેઠળ સાયબર ક્રાઇમ પોલીસ સ્ટેશનના પી.આઈ. વી.આર. ભરવાડ અને તેમની ટીમે આ ગુનાનો ભેદ ઉકેલવામાં સફળતા મેળવી છે.

• ​ઝડપી તપાસ: ફરિયાદી પાસેથી કુલ ₹1,09,85,570/- ની છેતરપિંડી કરવામાં આવી હતી.

• ​ટેકનિકલ એનાલિસિસ: પોલીસે ગુનામાં વપરાયેલા મોબાઈલ નંબર અને બેંક એકાઉન્ટ્સના આધારે તપાસ કરીને સુરત અને જુનાગઢ સુધી કડીઓ મેળવી હતી.

• ​કરોડોના ટ્રાન્ઝેક્શન ઝડપાયા: પોલીસ તપાસમાં બહાર આવ્યું છે કે આરોપીઓ દ્વારા સંચાલિત બેંક ખાતાઓમાંથી અંદાજે ₹4.56 કરોડથી વધુના નાણાકીય વ્યવહારો થયા હતા, જે સાયબર ક્રાઇમના મોટા નેટવર્ક તરફ ઇશારો કરે છે.

​ઝડપાયેલા આરોપીઓ અને મુદ્દામાલ

​પોલીસે સુરતથી દિવ્યેશ ઉર્ફે દિવો ભુવા, કિશન ધડુક, પ્રશાંત વઘાસિયા અને જુનાગઢથી રૂષપ સતાસીયાની ધરપકડ કરી છે. આરોપીઓ પાસેથી 4 મોબાઈલ ફોન, 6 ATM/ડેબિટ કાર્ડ અને અન્ય દસ્તાવેજો કબજે કરવામાં આવ્યા છે. આરોપીઓને કોર્ટમાં રજૂ કરી 4 દિવસના રિમાન્ડ મેળવી પોલીસે વધુ પૂછપરછ હાથ ધરી છે.

​ભરૂચ પોલીસની જનતાને નમ્ર અપીલ

​ભરૂચ પોલીસ હંમેશા જનતાની સેવામાં તત્પર છે. સાયબર ક્રાઇમથી બચવા માટે પોલીસે અપીલ કરી છે કે:

• ​વધુ નફાની લાલચ આપતી અજાણી લિંક્સ પર વિશ્વાસ ન કરવો.

• ​છેતરપિંડીનો ભોગ બનો તો તાત્કાલિક સાયબર હેલ્પલાઇન નંબર 1930 પર સંપર્ક કરવો.

​“ભરૂચ પોલીસ આપની સાથે, આપની માટે, હંમેશા…..”