🔥અંકલેશ્વરના સ્ક્રેપ માર્કેટમાં “પ્લાસ્ટિક ભજીયા”ની કઢાઈ ઉકળી! ડીપીએમસી ફાયર વિભાગે તાવડી શાંત કરી!

અંકલેશ્વર. રાબેતા મુજબ અંકલેશ્વર નજીક આવેલા નોબલ સ્ક્રેપ માર્કેટમાં ફરી એકવાર “પ્લાસ્ટિક ભજીયા” તળાવવાનો ધંધો મોડી રાત્રે ધમધોકાર શરૂ થઈ ગયો હતો!

હાઇવેને અડીને આવેલા આ માર્કેટના એક વેસ્ટ પ્લાસ્ટિકના ગોડાઉનમાં અગમ્ય કારણોસર ભડકો થતાં, જોનારાઓને દૂરથી એવું લાગતું હતું કે જાણે કોઈ મસમોટી કઢાઈ ઉકળી રહી છે. કચરાના ઢગલામાંથી આગની લપેટો એવી રીતે નીકળી રહી હતી કે એવું લાગે કે કોઈએ ભૂલથી ‘ફુલ ફ્લેમ’ પર ગેસ ચાલુ મૂકી દીધો હોય! આ ગોડાઉનવાળા ભાઈએ આખી રાત માટે ‘નાઈટ શિફ્ટ’માં ભજીયા બનાવવાની તૈયારી કરી હોય એમ, બાજુમાં આવેલી ભડકોદ્રા ગ્રામ પંચાયતની વેસ્ટ મેનેજમેન્ટ સાઈડનો કચરો પણ આ ‘આગમ્ય ભજીયા પાર્ટી’માં સામેલ થઈ ગયો હતો, જેના કારણે ગરમાવો વધી ગયો હતો.

આ “કઢાઈ”ને શાંત પાડવા માટે તાત્કાલિક અંકલેશ્વર ડીપીએમસી ફાયર બ્રિગેડની ત્રણ-ત્રણ ટીમોએ દોટ મૂકી હતી. ફાયર ફાઈટરોએ ભારે જહેમત ઉઠાવીને આ ‘ભજીયા પાર્ટી’ને સમેટી લીધી હતી, પણ પ્લાસ્ટિક અને કેમિકલ વેસ્ટની બેગનો માલ હોવાથી સવાર સુધી પણ ધીમા તાપે ‘શેકવાનું’ ચાલુ જ રહ્યું હતું. આ રાત્રિભરની ‘તળવાની’ ઘટનામાં ગોડાઉનમાં ભરેલો તમામ વેસ્ટ પ્લાસ્ટિક કચરો બળીને ‘ભજીયા’ની જેમ ખાખ થઈ ગયો હતો.

GPCBનું ‘મૌન વ્રત’: બે નંબરના ધંધાર્થીઓ પર ક્યારે થશે કડક પગલાં?

જોકે, આ સમગ્ર ઘટનાક્રમમાં સૌથી મોટો સવાલ **ગુજરાત પ્રદૂષણ નિયંત્રણ બોર્ડ (GPCB)**ની કામગીરી પર ઊભો થાય છે. સ્થાનિકોમાં ચર્ચા છે કે:

1. ) GPCB કેમ મૌન છે? સ્ક્રેપ માર્કેટમાં વારંવાર આગ લાગવાના, ગેરકાયદેસર કચરાનો સંગ્રહ કરવાના અને પર્યાવરણને જોખમ પહોંચાડવાના બનાવો છતાં GPCB કેમ આ બે નંબરના ભંગારીઓ સામે કડક પગલાં ભરતું નથી?

2. ) GPCB કેમ પ્રેસ નોટ જાહેર નથી કરતું? પોલીસની જેમ GPCB કેમ આવી ગેરકાયદેસર પ્રવૃત્તિઓ સામે લેવાયેલા પગલાંની પ્રેસ નોટ કે જાહેર માહિતી જાહેર કરતું નથી? શું બોર્ડ માત્ર કાગળ પર કામગીરી બતાવી સંતોષ માને છે?

3. ) GPCBની કામગીરી પ્રજાને કેમ સમજાતી નથી? વારંવારની આગ અને પ્રદૂષણની સમસ્યાઓ વચ્ચે પ્રજાને એ નથી સમજાતું કે પર્યાવરણની રક્ષા માટે બનેલું આ બોર્ડ ખરેખર શું પગલાં લઈ રહ્યું છે.

વાયરલ મેસેજનો સવાલ: ઉપલા અધિકારીઓ ક્યારે બાય ચડાવશે?

આગની આ ઘટના ફરી એકવાર દર્શાવે છે કે માત્ર ફાયર વિભાગ દોડે એ પૂરતું નથી. જ્યાં સુધી GPCB જેવા નિયમનકારી તંત્રો આવા જોખમી અને ગેરકાયદેસર એકમો સામે ખડક પગલાં ભરીને દાખલો બેસાડશે નહીં, ત્યાં સુધી અંકલેશ્વરનું આ સ્ક્રેપ માર્કેટ સમયાંતરે “પ્લાસ્ટિક ભજીયા” તળતું જ રહેશે!

હવે પ્રજા અને મીડિયામાં આ મેસેજ વાયરલ થયા પછી, સૌથી મોટો પ્રશ્ન એ છે કે શું ઉપલા અધિકારીઓ ખરેખર જાગશે? કે પછી સ્થાનિક કક્ષાએ ચાલતી ભ્રષ્ટ મિલીભગતથી આંખ આડા કાન કરનાર અધિકારીઓ સામે આ મેસેજને આધારે બાય ચડાવશે અને કોઈ મોટી સફાઈ અભિયાન હાથ ધરાશે? કે પછી આ આગની ઘટના પણ અન્ય બનાવોની જેમ માત્ર ચર્ચાનો ધુમાડો બનીને શાંત થઈ જશે?