ફરાર આરોપીનો ખેલ ખતમ: ટ્રિપલ મર્ડર અને લૂંટનો વોન્ટેડ બે વર્ષ પછી લીંબુની વાડીમાંથી ઝડપાયો!

ભરૂચની પેરોલ ફર્લો સ્ક્વોર્ડને એક મોટી સફળતા મળી છે. ટ્રિપલ મર્ડર (Triple Murder), લૂંટ, અને આર્મ્સ એક્ટ જેવા ગંભીર ગુનામાં સંડોવાયેલો અને છેલ્લા બે વર્ષથી પોલીસને ચકમો આપતો આરોપી આખરે ઝડપાઈ ગયો છે.

ઝડપાયેલા આરોપીનું નામ લાલજી ઉર્ફે લાલો ગણેશભાઈ સોલંકી છે. આ આરોપી અંકલેશ્વર તાલુકા સબ જેલમાં કાચા કામના કેદી તરીકે સજા ભોગવી રહ્યો હતો.

કેવી રીતે બન્યો ફરાર?

આરોપી લાલજી સોલંકી વિરુદ્ધ અંકલેશ્વર રૂરલ પોલીસ સ્ટેશનમાં IPC કલમ ૩૯૬ (ડકૈતી દરમિયાન હત્યા), ૩૯૭, ૪૪૭, ૪૪૯ સહિતની કલમો હેઠળ ગુનો નોંધાયેલો છે.

તેને ૧૮/૦૮/૨૦૨૩ ના રોજ વચગાળાના જામીન (Interim Bail) પર મુક્ત કરવામાં આવ્યો હતો.

જામીનની અવધિ પૂર્ણ થતાં, તેને ૦૬/૦૯/૨૦૨૩ ના રોજ અંકલેશ્વર તાલુકા સબ જેલ ખાતે હાજર થવાનું હતું.

જોકે, તે જેલમાં હાજર ન થતાં છેલ્લા બે વર્ષથી ફરાર હતો.

લીંબુની વાડીમાંથી દબોચાયો:

પોલીસ મહાનિરીક્ષકશ્રી સંદીપસિંહ, વડોદરા વિભાગ, તથા જિલ્લા પોલીસ વડા શ્રી અક્ષય રાજ સાહેબની સૂચનાના આધારે પેરોલ/ફર્લો જમ્પ કરનાર આરોપીઓને પકડવા માટે વિશેષ મહત્વ આપી કામગીરી હાથ ધરવામાં આવેલી.

પો.સબ.ઇન્સ. આર.એસ. ચાવડાના માર્ગદર્શન હેઠળ ભરૂચ પેરોલ ફર્લો સ્ક્વોર્ડની ટીમને પો.કો. અનિલભાઈ દિતાભાઈ કટારા તરફથી ચોક્કસ બાતમી મળી હતી. બાતમી મુજબ, ફરાર આરોપી વડોદરા જિલ્લાના પાદરા ખાતે છુપાયેલો હતો.

બાતમીના આધારે, ટીમે હ્યુમન ઇન્ટેલિજન્સ અને ટેક્નિકલ સર્વેલન્સની મદદથી વડોદરા જિલ્લાના પાદરા તાલુકાના વીરપુર ગામની સીમમાં આવેલ સચીનભાઈ શાંતિલાલ પટેલની લીંબુની વાડીમાં આવેલા એક મકાનમાંથી લાલજી ઉર્ફે લાલો સોલંકીને ઝડપી પાડ્યો હતો.

પકડાયેલા આરોપીને વધુ કાર્યવાહી માટે અંકલેશ્વર તાલુકા સબ જેલ ખાતે સોંપવામાં આવેલ છે.

સફળ કામગીરી કરનાર ટીમ:

આ સફળ કામગીરીમાં પો.સબ.ઇન્સ. શ્રી આર.એસ. ચાવડા, હે.કો. ભોપાભાઈ ભૂંડિયા, હે.કો. રાકેશભાઈ કંડોલીયા, પો.કો. સરફરાજ ગોહીલ, પો.કો. અજયસિંહ પરમાર, પો.કો. શક્તિસિંહ ગોહીલ, પો.કો. અનિલભાઈ કટારા અને પો.કો. શામજીભાઈ ભીલ સહિતની ટીમે ટીમવર્કથી સફળતા હાંસલ કરી છે.