અંકલેશ્વર ના આસોપાલવ ગેસ્ટ હાઉસ નજીકથી 7.20 લાખનો દારૂ ભરેલી કાર ઝડપાયા ના ઞુનામા સસ્પેન્ડેડ પોલીસકર્મીની ધરપકડ

અંકલેશ્વરની પ્રતિન ચોકડી નજીકથી ભરૂચ ક્રાઇમ બ્રાન્ચે રૂ. 7.20 લાખનો વિદેશી દારૂનો જથ્થો ભરેલી એક કાર ઝડપી પાડી હતી. આ મામલે પોલીસે કારચાલક સુરતના ચિરાગ રસીક સુદાણીની ધરપકડ કરી હતી. પોલીસ પૂછપરછમાં ચિરાગે ચોંકાવનારો ખુલાસો કર્યો કે આ દારૂનો જથ્થો સસ્પેન્ડેડ પોલીસકર્મી સંજય ચાવડાએ મોકલાવ્યો હતો.

આ માહિતી મળતાં જ GIDC પોલીસે વલસાડથી સંજય ચાવડાની ધરપકડ કરી છે, જેથી સમગ્ર પોલીસબેડામાં ખળભળાટ મચી ગયો છે.

પોલીસ તપાસમાં સામે આવ્યું છે કે સંજય ચાવડા સુરતથી દારૂ ભરીને જૂનાગઢ મોકલતો હતો. આ કામ માટે તે ચિરાગને ₹10,000 ચૂકવતો હતો. ઉલ્લેખનીય છે કે, 2016માં પોલીસમાં જોડાયેલ સંજય ચાવડા વલસાડ જિલ્લામાં ફરજ બજાવતો હતો અને 2024માં પણ તે દારૂની હેરાફેરીના ગુનામાં ઝડપાયો હતો. આ ધરપકડ બાદ પોલીસ આ રેકેટમાં વધુ લોકો સંડોવાયેલા છે કે કેમ તેની તપાસ કરી રહી છે.